Ipatuman ang mas istrikto nga implementasyon sang monitoring kag inspection sang mga naga-sulod nga isda sa syudad sang Cadiz, kasunod sang nagluntad nga food poisoning incident.
Sa interview sang Bombo Radyo kay Cadiz City Mayor Salvador Escalante, Jr., kinahanglan nga may kumpleto nga dokumento kag auxiliary permit ang tanan nga naga-deliver sang isda halin sa guwa sang syudad kag dapat may actual inspection antes ini ibaligya sa merkado.
Suno diri, ang ini nga tikang ang ipatuman agud masiguro ang seguridad sang mga pumuluyo kag maproteksyunan man ang mga fish vendors.
Mensahe ni Mayor Escalante, mag-serbe ini nga leksyon sa mga manugbaligya isda kag sa mga konsumidor nga mas mangin maid-id sa pagpili sang mga ginabakal nga isda agud malikawan ang mga ginadumilian nga insidente.
