BACOLOD CITY — Ginhold sang mga otoridad ang apat ka mga lalaki nga sakay sa bangka nga nagdungka sa ciudad sang Sipalay kahapon nga wala sang mapakita nga dokumento.
Suno kay Lt. Senior Grade Jimmy Oliver Vingno, commander sang Coast Guard Station Bacolod, gilayon nga nagreport ang mga pumuluyo sa mga otoridad matapos ang pag dungka sang bangka sa Brgy. 2 pasado las 8:00 kahapon sang aga.
Sa pag pangusisa sang mga otoridad wala sang mapakita nga dokumento ang mga sakay nasambit nga bangka nga nagikan sa Zamboanga kag padulong kuntani sa Mindoro.
Suno kay Vingno, nahisayran sa nasambit nga mga lalaki nga nagdungka lamang sila sa Sipalay agud magbakal sang gatong sa ila nga motor.
Sa karun yara sa Coast Guard Sub-station sa Hinigaran ang kapitan sang bangka para sa dugang nga imbestigasyon samtang gin bilin naman sa Sipalay ang mga upod sini.
Subong nga adlaw, hibaluon man sang ciudad kun anu ang mahimo mangin sanction sa nagkaladakpan bangud sa pagsulod sang mga ini sa teritorial waters sang Negros Occidental nga wala sang dokumento.
Kadungan sini, gin paidalom sa profiling ang mga lalaki apang negatibo sa involvement ang mga ini sa Maute terror group.
Nahibaluan nga hugot ang pagbantay karun sang mga otoridad sa mga baybayon bangud sang posible spill-over sang mga terorista gikan sa Marawi City.
