BACOLOD CITY-Nadakpan na ang pila ka miembro sang New People’s Army (NPA) nga nakaengkwentro sang mga suldado sang Hunyo 23 sa Manjuyod, Negros Oriental kun sa diin isa ang napatay samtang duha ang pilason.
Madumduman nga Domingo sang kaagahon sang nakaengkwentro sang 79th IB, Philippine Army ang mga rebelde sa Sitio Kambugtong, Barangay Bantolinao kun sa diin napatay si Corporal Leotor Cagape samtang pilason naman sanday PFC Emanuel Paja kag Private Denyl Reyes.
Alas-3:00 kaina sang kaagahon sang nadakpan sang 11th Infantry Battalion ang apat ka NPA members sa Sitio Maraja, Brgy. Lamogong, Manjuyod.
Kalakip sa mga nadakpan ang 35-anyos nga si Rea Casido; Teodor Casido, 49; Danny Casido, 41, kag Venancio Cadeliña, 60.
Sa impormasyon nga nakuha sang Bombo Radyo Bacolod, nagapatigayon sang continued clearing operation kag patrolling ang tropa sang militar sang nakit-an ang apat.
Nagtuyo pa nga magpalagyo ang apat apang nadakpan sang mga suldado.
Narekober sa paghinakop sang mga rebelde ang 3 rifle grenade, 3 hand grenade, anom ka 30 rounds kag isa ka 20 rounds sang KG-9 magazines, 90 live ammunitions sang 9mm caliber, binocular, subversive documents kalakip na ang personal nga mga gamit.
Priso na karun sa Manjuyod Municipal Police Station ang apat kag natalana nga pasakaan sang nagakaigo nga kaso.
