Patay ang 51-anyos nga mangunguma matapos ginbuno sang iya kaupod sa pag-inom sang makahulubog nga ilimnon sa Purok La Roca, Barangay Sta. Rosa, banwa sang Murcia alas-10:45 sang gabi, Hulyo 5.
Ginkilala ang biktima nga si alyas “Elpedio”, 51-anyos, lalaki, single kag mangunguma samtang ang suspect amo si alyas “Joemar,” 41-anyos, lalaki, kasado, truck driver kag lunsay mga residente sang nasambit nga lugar.
Sa interview sang Bombo Radyo kay Police Captain Honey Labaro, Hepe sang Murcia Municipal Police Station, ginapahayag sini nga samtang naga-inom sang makahulubog nga ilimnon ang biktima kag ang suspect nabatian sang mga katupad nga balay nga sila ang nagsinabtanay.
Suno diri, ginbuno ni Joemar si Elpedio sang makapila nga beses gamit ang binangon kag gilayon nga naggwa sa balay.
Gintunol sini ang binangon sa iya katupad nga balay kag naghambal nga ginbuno niya ang biktima.
Si Elpedio ang naka-agom sang pilas sa iya alatrasan, ulo kag liog nga nagresulta sang iya kamatayon.
Ang suspect naman ang nadakpan sa hot pursuit operation sang kapulisan.
Suno diri, ang duha ang mag-abyan bangud gina-paistar man ni Joemar sa iya balay si Elpedio.
Ginalantaw hinubog kag pagpangutos ang rason sang pagpamuno.
Suno kay Labaro, nagkoordinar na ang kapulisan sa pamilya sang biktima angot sa kaso nga mahimo ipasaka batok sa suspect.
