Daan nga pagdumot ang ginalantaw nga rasun sa pagluthang patay sang 19 anyos nga lalaki sa 51 anyos nga mangunguma sa Purok Citrus, Barangay Bunga, Salvador Benedicto, Negros Occidental.
Ang biktima ang ginkilala nga si Nelger Zayco, 51 anyos, samtang ang suspect ang ginkilala lamang kay Angelo, 19 anyos.
Sa interview sang Bombo Radyo Bacolod kay Police Major Ryan Villasario, hepe sang Don Salvador Benedicto Municipal Police Station, alas-9:21 kahapon sang aga, samtang padulong sa punong si Zayco, siya ang temporaryo nga nagpulupahuway sa isa ka kahoy apang ini ang ginpalapitan sang suspect kag ginluthang sa likod sang ulo.
Kasunod sang krimen, si Angelo ang gilayon man nga nagpalagyo kag nanago.
Sa imbestigasyon sang kapulisan, may-ara sang daan nga hiligut-anon sa duha apang padayun pa nga ginaverify kun ano gid ang ila nga gin-awayan.
Suno pa kay Villasario, sila ang may witness sa nasambitan nga krimen.
Sa karun wala pa matumod ang armas nga gingamit sang suspect, apang sila ang nakarecover sang 4 ka bala sang 12 guage shotgun.
Padayun man sa karun ang pursuit operation sa suspect kag nagapanawagan man ang mga kapulisan sa pamilya ni Angelo nga ini ang mapasungka.
Pasalig ni Villasario sa pamilya sang biktima nga himuon nila ang tanan agud mahatag ang nagakaigo nga hustisya.
