BACOLOD CITY — Nabatyagan ang mahina nga pagtay-og sa ciudad sang Bacolod kag iban nga parte sang Negros Occidental pasado las-4:00 Huwebes sang hapon.
Suno sa opisyal nga data gikan sa Philippine Institutue of Volcanology and Seismology (Phivolcs), Intensity 1 lamang ang pagtay-og sa Negros Occidental apang Intensity 2 kag Intensity 3 naman sa iban pa nga bahin sang probinsiya.
Nabalhag ang epicenter sa Leyte sa kabaskugon nga magnitude 6.5.
Sa karon, wala pa sang report nga nasamaran bangud sang amo nga linog.
Samtang, bisan pa nga wala man tuman nga nabatyagan ang linog, madamo naman ang naalarma kag nag-post sa tagsa nila ka mga social media accounts may angot sa nabatyagan nga pagtay-og.
Samtang, nag-eksperyensiya sang brownout ukon blackout ang 60 tubtob 65 porsyento sang ciudad sang Bacolod kasunod sang linog nga nagluntad pasado las-4:00 kahapon sang hapon.
Suno kay Roel Venus, ang hepe sang Consumer Services Division sang Central Negros Electric Cooperative (CENECO), nag-blackout ang Alijis Feeders 1-6, Reclamation Feeder kag subong man sa Gonzaga kahapon sang hapon.
Sa ila pagpakig-angot sa National Grid Corporation of the Philippines (NGCP), indi pa masiguro kun san-o magabalik ang suplay sang kuryente bangud ini ang nag-ugat sa ginakuhaan sang supply sang CENECO sa Leyte.
Nahibaluan nga suno sa Phivolcs, nagluntad ang 6.5 magnitude nga linog sa Leyte las-4:08 kahapon sang hapon kag ini ang nabatyagan sa madamo nga porsyon sang Visayas.
