Ginpahayag sang provincial administrator sang Negros Occidental nga naghingyo ang probinsya nga sa mga military planes nga ipadala ang mga swab samples sang mga persons under investigation (PUIs) bangud kanselado man ang byahe sang mga eroplano bangud sa coronavirus disease (COVID-19).
Sa interview sang Bombo Radyo kay Atty. Rayfrando Diaz, ginpahayag sini nga bangud wala sang eroplano nga nagabyahe, nabudlayan ang probinsya nga magpadala sang mga swab samples sa Research Institute for Tropical Medicine (RITM) gani naghingyo ini nga kun pwede magamit ang mga military planes kada duha ka adlaw agud magdala sang samples sang Manila.
Ginkompirmar man ni Diaz nga magapadayon ang regular session sang Sangguniang Panlalawigan subong nga adlaw.
Suno sa iya, nadisinfect naman sang Sabado ang opisina sang SP pati na ang iya ka provincial administrator.
Nagpasalig man ini nga nagahalong ang mga opisyales nga indi maigo sang masakit agud indi makalaton sa iban.
Gin-athag man sang provincial administrator nga handa nga magbakal sang test kits si Governor Eugenio Jose “Bong” Lacson apang sa karun, wala pa sang kits nga aprubado sang Bureau of Food and Drug (BFAD), Department of Health (DOH) ukon World Health Organization (WHO).
Suno kay Diaz, madamo sang naga-offer sang test kits sa probinsya apang bangud wala ini sang certification nagikan sa nasambit nga mga ahensya, dako ang mangin risgo kun gamiton ini.
Suno sa iya, kun indi reliable ang mga test kits nga gamiton kag sala ang resulta sini, posible nga mas maglapta pa gid ang virus.
Gani sa karun, suno kay Diaz, ginahulat pa ang mga test kits nga aprubado sang BFAD, DOH ukon WHO kag mabakal gilayon ang probinsya. Samtang, ginkumpirmar sang provincial administrator sang Negros Occidental nga ginpanagtag na ang pila ka mga personal protective equipment (PPEs) kag thermal scanners nga sa apat ka mga ospital sa probinsya nga pwede makabaton sang mga persons under investigation (PUIs) sa coronavirus disease 2019 (COVID-19).
Sa interview sang Bombo Radyo Bacolod kay Atty. Rayfrando Diaz, ginpahayag sini nga ginpang-distribute na ang mga kagamitan sa Teresita Jalandoni Provincial Hospital, Valladolid District Hospital, Kabankalan District Hospital kag Cadiz District Hospital.
Magapadala naman sang dugang nga 15 ka mga nurse, duha ka mga doktor kag duha man ka mga medical technologist ang probinsya sa apat ka mga nasambit nga ospital.
Pagakuhaon ang mga ini sa Escalante kag Calatrava District Hospitals.
Ginpasiguro man ni Diaz nga ang mga medical staff nga naka-assign sa isolation rooms ang wala na naga-atinder pa sang iban nga mga pasyente agud malikawan nga makalaton sang virus.
