Arestado ang walo ka mga persona nga nakuhaan sang nagkalain-lain nga mga armas, bala kag eksplusibo sa checkpoint operation sa Brgy Jonob-jonob, Escalante City kahapon sang hapon.
Alas-5:10 sang hapon samtang nagapatigayon sang border control kag checkpoint ang 1st Negros Occidental Police Mobile Force (NOCPFMC) ila na-intercept ang salakyan sang gina-alegar armado nga kalalakihan kag namutikan ni Patrolman Ruvic Bering ang isa ka pasahero nga nagbunot sang caliber .45 nga iya ginataklos.
Ginkilala ang nagbunot sang armas nga si Kenneth Serondo, 19-anyos, single, kag residente sang Sitio Magtuod, Brgy Bug-ang, Toboso.
Magluwas sa iya gin-aresto man ang iya kaupdanan nga sanday Clint Mangayon, 20, sang Brgy Jonobjonob, Escalante City; Joel Guillero, 40, sang So. Sampinit, Brgy. Libertad, Escalante City; Leon Charito, 60, sang So. Catagbacan, Brgy. San Isidro, Toboso; Buenvinido Ducay, 55, sang So. Napatlagan, Brgy Libertad, Escalante City.
Dakop man sanday Aiza Gamao, 32 sang Bayong, Brgy Balintawak, Escalante City; Jonathan Alcosiva, 21, sang Yolanda Housing, Palao, Brgy Washington, Escalante City, kag isa ka 17-anyos nga lalaki nga residente sang Yolanda Housing Palao, Brgy Washington, Escalante City.
Nakuha sa paghinakop sang mga suspetsado ang lima ka unit sang caliber 45; isa ka caliber 38; isa ka KG-9; tatlo ka rifle grenade; duha ka botelya sang improvised dynamite kag 21 ka botelya sang improvised petrol bomb kag mga bala.
Sa interview sa hepe sang Escalante City Police Station nga si Police Major Gil John Despi, nagapadayon pa ang ila imbestigasyon kun anu gid ang affiliation sang mga suspetsado.
Apang santo sa ila nga pag-usisa, ginpahayag sang mga suspetsado nga magapatigayon kuntani sang rally ang mga ini subong nga adlaw sa nasambit nga ciudad.
Posible nga magapangatubang sang kaso nga paglapas sa RA 10591 ukon Comprehensive Firearms and Ammunition Regulation Act ang mga suspetsado.
