Gindeklarar nga dead on arrival ang tiyo matapos nga ginluthang sang iya hinablos sa Crossing Carmen, Barangay Granada ciudad sang Bacolod alas-6:20 ang takna kagab-i, Marso 18.
Sa interview sang Bombo Radyo Bacolod kay Police Captain Portia Nillosan, station commander sang Police station 5, ang nagtaliwan ginkilala kay Rafael Cahina, 72-anyos, balo kag residente sang nasambit nga lugar samtang pilason naman ang anak sini nga si Noel Cahina, 45, kag isa ka tricycle driver matapos nga siya ang nasalabat.
Ginkilala naman ang suspek nga si Jano Cahina, 35, hinablos ni Rafael kag residente man sang nasambit nga lugar.
Suno kay Nillosan, si Jano ang may kaso sadto nga frustrated homicide.
Suno sa station commander antes pa man ang insidente, ginsaway sang suspek ang biktima nga indi pag-ilawig ang karbaw sini sa ginatrabahuan nga airsoft range.
Suno diri, bangud sa may daan na nga hiligut-anon, nagbaisay ang magtiyo kag gilayon nagkuha sang sulpak si Jano kag gintiro ang iya tiyo, kag didto naigo ini sa iya nawala nga bahin sang tiyan samtang nasalabat ang bata sini kag nakaagom sang pilas sa iya nga kamot.
Gilayon nga gindala sa ospital ang mag-amay apang ang amay ang gindeklarar nga dead on arrival sa Corazon Locsin Montelibano.
Nadakpan man gilayon sang mga kapulisan ang suspek kag nakahunong na sa Bacolod Police Station 5.
