Nagpagwa sang statement of support ang 82 ka mga Provincial Election Supervisor bilang pagsuporta kay Commission on Election (COMELEC) Chairman George Garcia sa mga ginapangatubang sini nga issues.
Ini kasunod sang pahayag ni SAGIP Partylist Representative Rodante Marcoleta nga ang Comelec officials partikular na si Garcia ang nagbatun sang suhol ukon bribe gikan sa Korean firm nga MIRU System para sa P17.9 billion contract sa pagserbe sa 2025 Midterm Elections.
Ang MIRU amo ang magaprovide sang 110,000 units sang automated counting machines, 104,000 Ballot Boxes kag 2,200 Canvassing System Server sa maabot nga eleksyon.
Madumduman nga sadto Smartmatic ang nakakuha sang kontrata sang nakaligad nga mga eleksyon apang sa ulihi nga bidding, gindisqualify ang Smartmatic samtang ang MIRU lamang ang nabilin nga bidder.
Pahayag ni Marcoleta nga may natrace nga offshore bank account sang mga Comelec Officials kag may ginaalegar P120 million nga bribe money.
Ang alegasyon ang ginpanginwala naman ni Garcia kag ginsundan sang letter of support sang 82 ka Provincial Election Supervisor sa Pilipinas.
Sa interview sang Bombo Radyo Bacolod kay Negros Occidental Provincial Comelec Supervisor Atty. Ian Lee Ananoria, ang pahayag ni Marcoleta ang pagpangguba lamang sa Comelec kag mga opisyales sini kag wala man sang basihan.
