BACOLOD CITY — Pormal na nga mabungkag ang Negros Island Region subong nga adlaw, Oktubre 9.
Bangud sini, magasirado na ang mga regional offices sang ahensya sang gobyerno nga nag-operate diri humalin sang Enero tuig 2016 nga indi magserbe bilang sub-office.
Madumduman nga sang Agusto 9, nagpagwa sang Executive Order 38 si Presidente Rodrigo Duterte nga nagabungkag sang NIR kag iya nga ginhatagan sang 60 dias ang mga opisina sa rehiyon nga magpatigayon sang transition process.
Ang EO 38 ang nagapawalang-bisa sa EO 183 nga ginpirmahan ni anay Presidente Noynoy Aquino III sadtong Mayo tuig 2015 nga nagtukod sang NIR.
Bangud sini, magabalik sa Region 6 ang Negros Occidental samtang mangin kabahin naman liwat sang Region 7 ang Negros Oriental.
Sa amo nga EO, ginapabalik ang mga personnel sang mga regional offices sa NIR sa ila nga anay units of deployment ukon iga-reassign sa iban nga departamento ukon ahensya.
60 ka adlaw ang ginhatag sa Negros Island Region nga hitsuhon ang tanan nga operasyon, transaksyon ukon layabilidad.
Ginmanduan man sang EO ang Department of the Interior and Local Government na i-supervise ang pagbulagay sang duha ka probinsya.
Suno kay DILG Region 6 Director Atty. Anthony Nuyda, may mga opisina nga magapabilin bilang sub-office sa idalom sang Western Visayas diri sa ciudad sang Bacolod ukon Central Visayas sa Dumaguete City nga indi na kinahanglan ang approval ni Duterte.
