Nagalaom ang Bureau of Jail Management and Penology nga mapabilin nga drug-free ang mga jail facilities sa bilog nga Negros Island Region.
Sa interview sang Bombo Radyo Bacolod kay BJMP NIR Spokesperson Jail Senior Inspector Juniven Umadhay, ginapasalamatan nila ang Philippine Drug Enforcement Agency (PDEA) sa pagpatigayon sang mga suprise inspections kag random drug test sa nagkalainlain nga jail facility sa NIR, nga nagasuporta sa target nga “drug free facility.”
Ginapakamaayo sini nga sumugod sang gin-establishar ang NIR bilang bag-o nga rehiyon, wala sang narecover nga mga narecover nga illegal nga droga kag wala man sang may nagpositibo sa illegal nga droga sa mga person deprived of liberty (PDLs) kag BJMP personnel.
Nagalaom si Umadhay nga padayun nga magakooperar ang mga PDLs, samtang ang pagpabilin nga drug-free sang jail facilities ang nagapakita naman sang pagka-professional sang mga personnel.
Pahanumdom sini nga hinali nga may matumod nga may personnel nga habitual nga nagagamit sang illegal nga droga, sila ang mangatubang sang mabug-at nga administrative sanction.
Sila ang mahimo pasakaan sang kaso nga “grave misconduct” nga magaresulta sa pagkadismiss sa serbisyo.
Ang mga PDLs naman nga magpositibo sa drug test ukon makuhaan sang illegal nga droga ang madisqualify sa tyansa nga maka-avail sang Good Conduct Time Allowance, nag makapanubo kuntani sang sentensya.
