Ginalauman nga maaprubahan ang 3 billion pesos nga 2020 annual budget sang ciudad sang Bacolod antes matapos ang bulan sang Nobyembre.
Sa interview sang Bombo Radyo Bacolod kay Councilor Cindy Rojas, chairman sang committee on appropriations and finance sang Sangguniang Panlungsod, natapos na ang tatlo ka adlaw nga budget hearing kahapon nga nagsugod pa sadtong Oktubre 29 kag 30.
Suno kay Rojas, halos nagsaka ang tanan nga pondo sang kada departamento sa Bacolod para sa masunod nga tuig.
Lakip sa mga departamento nga may mataas nga pondo sa 2020 amo ang Bacolod City Health Office nga may P169 million, Bacolod City College nga may P59 million, City Disaster Risk Reduction and Management Office nga may P19.5 million, Department of Social Welfare and Development nga may P78 million kag Bacolod City Police Office nga may yara sang P8 million.
Nahibaluan nga ang 2020 annual budget sang ciudad ang mas mataas sang 12 porsyento kun ipaanggid sa P2.52 billion nga pondo subong nga tuig.
Ang pondo ang magahalin sa 52% nga local taxes kag 48% nga internal revenue allotment (IRA).
Suno kay Rojas, lauman nga makapaguwa na sila sang committee report sa buwas nga adlaw, Miyerkules.
