May posibilidad nga may kahilabtanan sa iligal nga druga ang pagpatay sa isa ka lalaki sa Purok Tumpok, Barangay Zone 15 sa ciudad sang Talisay, Martes sang hapon.
Ini ang pahayag ni P/Staff Sgt. Edmundo Jomocan Jr., imbestigador sang Talisay City Police Station bangud suno sa iya kilala nga drug den ang lugar kun sa diin nasapwan nga patay sa sulod sang Toyota Vios ang biktima.
Suno pa kay Jomocan, dako man ang posibilidad nga mga kaupdanan man lang mismo sang biktima ang nagpatay sa iya bangud nga naka-plastar ini sa likod sang drivers seat sang ini ang nasapwan.
Sa karun, ini pa ang ginapadalman sang kapulisan sa Talisay.
Samtang, ginalantaw man sang Talisay police ang kaangtanan sang ginreport nga shooting incident sa Brgy. Zone 9 sa nasambit nga ciudad kahapon sang aga kun sa diin ginapahayag nga imbulbado ang isa ka puti nga van kag isa man ka Toyota Vios.
Sa dugang nga pag-usisa, nakapangalan kay Corazan Amacan sang Lot 19, Block 12, Woodside 2, Mansilingan, Bacolod City ang salakyan nga nasakyan sang biktima santo sa plaka sini nga ADM-7965.
