Nagbaton ang Bombo Radyo Bacolod sang pinakamataas nga pasidungog nagikan sa Philippine Red Cross bangud sa padayon nga pagsuporta sa promotion sang voluntary blood donation kag sa pag-organisar sang mass blood donation activities agud nga makasalbar sang kabuhi sang iban kag mapasiguro man ang bastante nga supply sang safe kag quality nga dugo.
Kadungan sang Handog Pasasalamat para sa Dugong Negrense 2019 sang Philippine Red Cross sa Social Hall sang Negros Occidental Provincial Capitol kaina sang udto, nagbaton ang Bombo Radyo Bacolod sang Blood Services Platinum Award.
Ang Bombo Radyo ang naga-isahanon nga estasyon sang radyo sa Negros Occidental nga ginhatagan sang kaangay nga pasidungog.
Suno kay Rita Benita Mirasol, OIC administrator sang Philippine Red Cross Bacolod City Chapter, ang makakuha sang Platinum Award amo ang kompaniya ukon organisasyon nga tayuyon ang bloodletting sa sulod sang napulo ka tuig pasaka kag masobra 1, 000 ka units ang nakolekta sa amo nga period.
Santo sa rekord, ang Bombo Radyo Bacolod ang nakatipon sang 4, 190 blood units sa sulod sang 13 ka tuig nga partnership sa Red Cross.
Suno kay Mirasol, mismo si Red Cross Chairman kag Chief Executive Officer Senator Richard Gordon ang nagpirma sa plaque nga ginhatag sa Bombo Radyo.
May yara man sang non-government organizations kag barangay nga nagbaton sang pasidungog kaangay sang Barangay Handumanan, Mansilingan, kag Alijis samtang sa mga banwa naman, ini ang ginalakipan sang Pulupandan, Murcia, Valladolid kag Isabela.
Nagpanawagan man ini sa mga makasarang magdonar sang dugo nga makigbahin sa Dugong Bombo 2019 nga patigayunon sa Nobyembre 16 sa City Mall Mandalagan.
Suno kay Mirasol, sarang gid makadonar ang mga naga-edad 16 tubtub 75, basta may yara sang waiver nagikan sa ginikanan ang mga menor de edad.
Ini ang kabahin suno sa iya sang preparasyon para sa Christmas kag holiday season kun sa diin maiwat ang blood supply.
Nagpanawagan man ini sa mga indibidwal nga Type AB ang dugo nga magdonar sa blood center bangud manubo ang supply subong.
