Ginkompirmar sang Department of Health Region 6 Child Health Program nga nagnubo na ang kaso sang measles sa Negros Occidental.
Sa interview sang Bombo Radyo Bacolod kay Dr. Mary Jane Juanico, DOH–CHD 6 Medical Health Coordinator, ginpahayag sini nga sa 31 ka mga local government units sa probinsya, may yara na sang 28 ka mga LGUs nga nagreport nga zero na ang kaso sang tipdas sa sulod sang anom ka semana.
Sa record ni Juanico, may yara sang 3,080 ka mga kaso sang tipdas humalin January 1 tubtob November 9, 2019 sa bilog nga Western Visayas kag 482 diri ang kompirmado.
Suno sa iya, may yara sang 237 ka mga kaso sa Iloilo, 99 sa Antique samtang 91 naman sa Negros Occidental.
Aminado ang coordinator nga sa 14 ka mga nagkalamatay sa tipdas, lima ang halin sa Negros Occidental apang suno sa iya, sa duha ka bulan, dako ang pagnubo sang kaso sini sa probinsiya.
Sa nagligad nga duha ka bulan suno kay Juanico, 60% pa lang sang mga munisipalidad kag syudad sa Negros ang nagdeklarar nga zero na ang kaso sang tipdas sa ila nga lugar apang sini nga bulan, nagsaka ini sa 70%.
Nagalaom ang DOH–CHD 6 nga magpadayon sa pagsaka ang porsyento sang mga syudad nga nagareport sang maayo nga balita.
Sa karun, nagapadayon sila sa gihapon sa pagpangbakuna sa mga eskwelahan agud matapna ang nasambit nga balatian.
Nagpanawagan man ini sa mga ginikanan nga pabakunahan ang ila mga kabataan kag indi pagpabuyan-buyanan kun makita nila nga indi maayo ang ginabatyag sang mga ini.
