Patay ang isa ka lalaki samtang pilason naman ang iya live-in partner matapos ginluthang sa Purok Kagaykay Brgy. 2 ciudad sang Bacolod subong nga Lunes sang gab-i.
Ginkilala ang biktima kay Roberto Salvador alyas Kumpol, 50-anyos nga tumandok sang ciudad sang Sagay apang naga-istar na karun sa Brgy. 3, Bacolod City.
Isa ka igo sa ulo ang naangkun sang biktima nga gintunaan sang iya gilayon nga kamatayon.
Magluwas kay Salvador, pilason man ang iya live-in partner nga si Christine Tipon, 30-anyos sang Brgy. 4 Bacolod City.
Suno naman kay Robert Mondido, residente sa lugar, nakabati sila sang lima tubtob pito ka mga lupok.
Sa impormasyon nga nakuha sang Bombo Radyo Bacolod, duha ka igo sa natuo nga tiil, isa sa nawala nga batiis kag isa man sa butkon ang naangkun ni Tipon nga gilayon naman gindala sa Corazon Locsin Montelibano Memorial Regional Hospital.
Nahibaluan nga nagalakat si Salvador kag Tipon sang ginluthang ang mga ini sang duha ka mga suspetsado nga nagalakat man.
Santo sa imbestigasyon sang Police Station 2 sa pagpamuno ni Police Major Sherlock Gabana, ini na ang ikaduha nga kahigayunan nga gintuyo nga patyon si Salvador.
Suno kay Gabana, may mga impormasyon sila nga nakuha nga imbulbado si Salvador sa balduganay sa iligal nga druga kun sa diin sa baylo nga shabu, tawas ang ginahatag sini sa kustomer.
Sa karun plano sang Station 2 nga imbestigaran kun ang mga suspetsado sa una nga pagtuyo nga patyon si Salvador, amo man ang mga suspetsado sa pagpatay sa iya sini nga gab-i.
