Nalipay ang tagpamaba sang 3rd Infantry Spearhead Division sang Philippine Army nga napirmahan na ang Anti-terrorism Bill.
Suno kay Major Cenon Pancito III, madugay na nga luyag sang sektor sang otoridad nga maislan ang daan nga human security act sa pungsod.
Suno diri, may limitasyon ang una nga layi sa pag-implementar sang mga tikang batok sa mga rebelde nga grupo.
Nahibaluan nga may-ara sang kasuguan ang United Nations sa kabug-usan nga dapat seryoso nga pagtutok nahanungod sa terorismo.
Gani ginawelome gid sang 3rd ID ang panibag-o nga layi kag pagapadayunon ang katungdanan sa pagsiguro sa peace and order sa rehiyon.
Ginpanindugan naman sini nga tanan nga layi ang sarang maabusuhan apang mas dapat nga indi magpakulba ang mga pumuluyo kag tan-awon ang maayo nga tinutuyo sini.
Kun negatibo lang suno sa iya ang tan-awon wala sang mapasar nga layi bangod wala naman sang perpekto nga kasuguan.
Ginpa-intindi ni Pancito nga may safeguard na nga naka-apid sa layi para maseguro nga maayo nga maimplementar kag magapangatubang naman sa penalidad ang maga-abuso sini.
Ginaseguro sini sa mga pumuluyo sang Visayas nga ipatuman sang mga ini sang nagakaigo ang layi kag gilayon nga ipadangat sa otoridad kun may makita nga kasaypanan sa pagpatuman.
Nanindugan ini nga batok sa terorista ang layi gani wala sang dapat kakulbaan ang wala sang may ginahimu nga malain.
Ginpaathag man sini nga ang mga desente nga opinyon batok sa gobyerno ang wala ginakunsidera terrorismo, bangod nagapabilin gihapon nga democratic ang pungsod.
