Nagapati ang isa ka abogado nga dako ang posibilidad nga mapaiway ang 2022 national elections sa tion nga magdeklarar sang Revolutionary Government si Presidente Rodrigo Duterte.
Sa interview sang Bombo Radyo Bacolod kay Atty. Jomax Ortiz, ginpahayag sini nga dako ang posibilidad nga iduso sang Duterte administration nga mapalawig pa ang termino ni Presidente Duterte.
Paathag ni Ortiz, madamo sang pwede magamit nga legal basis si Duterte agud magdeklarar sang Revolutionary Government kag mapaiway ang piniliay sa 2022.
Pila sa mga legal basis nga pwede makadeklarar sang Revolutionary Government suno sa abogado amo ang ginapangatubang nga coronavirus pandemic.
Dugang pa ni Ortiz nga indi preparado ang Commission on Elections (Comelec) kag kulang ang pondo sang ahensyan agud magpatigayon sang eleksyon.
Suno pa diri nga ang pagdeklarar sang Revolutionary Government lamang ang maka-justify agud makalapaw sa termino si Duterte.
Wala naman ini nagapati sa nangin pahayag sang damlag lang sang Malacañang nga indi sila pabor sa pagpaiway sa eleksyon.
Suno kay Ortiz, makapila ka bes na nga natabo nga lain ang ginapahayag sang Palasyo kag lain man ang nagakatabo.
Madumduman nga ginhaylo ni Pampanga Rep. Mikey Arroyo ang Comelec sadtong Huwebes nga ikonsiderar ang pagpaiway sa 2022 national elections bangud sa kahadlok sang mga botante sa COVID-19.
