Tatlo ka mga lugar ang ginpatigayunan sang Peace Covenant Signing nga gintawag “Kasimbayanan for safe 2022” sang Miyerkules kag Huwebes sa syudad sang Bacolod.
Ini ang ginlakipan sang Peace Covenant Signing sa Bacolod City Police Office (BCPO) Headquarters, Bacolod City Government Center kag Headquarters sang Team Asenso sa La Salle Village.
Ang programa ang ginpangunahan sang Commission on Election (Comelec), BCPO, Department of the Interior and Local Government (DILG), Simbahan kag iban pa, kun sa diin gin-imbetar ang tanan nga mga kandidato sa 2022 local elections nga magpirma.
Ang Peace Covenant Signing nga ginpatigayon sa BCPO Headquarters kahapon, ang gintambungan sang Comelec; BCPO Personnels kag mga independent candidate sa palaabuton nga 2022 elections.
Samtang kadungan sini, nagpatigayon man sang programa ang Grupo Progreso alas-2:00 sang hapon sa Bacolod City Government Center nga gintambungan sang tanan nga mga nagapapili sa partido kalakip na ang aspirant sa pagkakongresista; alkalde, bise alkalde kag 12 ka mga konsehal.
Samtang ang Grupo Asenso naman ang nagpatigayon sang Miyerkules sa La Salle Village nga gintambungan man sang kompleto nga slate sang oposisyon.
Ginpahayag ni Vice Mayor El Cid Familiaran, ang Grupo Progreso ang nagdesisyon nga sa Bacolod City Government Center.
Ini ang separado sa ginpatigayon sa BCPO Headquarters agud malikawan ang pagginutok sa lugar.
Samtang ginpaathag naman ni Vice Mayoral Aspirant Atty Ceasar Distrito nga nag-ayo sila nga sang Miyerkules na ipatigayon ang Peace Covenant Signing bangod may natalana sila nga team building kahapon.
Ginpakamaayo man sini nga tanan nga mga katapo sang Grupo Asenso ang nagpartisapar sa proyekto para sa mas hilway nga eleksyon.
Aminado ini nga mas bentaha sa ila ang Peace Covenant bangod sila ang challeger kag indi magamit sang kontra ang benepisyo sang gahom.
Nagalaum naman ini nga indi na maliwat pa ang kaangay sa pagpamalos sang campaign materials kun sa diin gin-abuso sang mga katapos sa administrasyon.
Samtang ginpahayag nman ni BCPO Director P/Col Thomas Joseph Martir nga apisar nga may political rivalry sa syudad sang Bacolod, wala naman ini nagadangat sa bayolensya.
Gani nagapati ini nga mangin malinong kag matawhay ang pinili-ay.
Bangod indi hotspot kag generally peaceful ang eleksyon sa syudad ginabantayan nalang sang mga ini ang pagtililipon agud malikawan ang posibilidad sang pag-ilinaway.
