Ginpahayag sang tagpamaba sang Land Transportation Franchising and Regulatory Board (LTFRB) 6 nga indi sila makapangdakop sa mga indi rehistrado ukon wala nakarenew sang prangkisa nga mga public utility jeepneys sa Bacolod bangud wala sila sang personnel nga maga-operate para diri.
Sa interview sang Bombo Radyo kay Atty. Salvador Altura, nagmeeting sila sang tinalikdan nga semana kaupod si Mayor Alfredo Benitez kaupod ang mga PUJ operators kag drivers kag nag-ayo ang alkalde nga indi anay ang mga ini pagpangdakpon.
Suno kay Altura, naghipos na lamang sila sang naghingyo sa Benitez bangud wala man sila sang personnel nga maga-operate sini.
Apang suno sa iya, wala ini nagapatimaan nga pahanugutan ang set up nga sarang lamang makabyahe ang mga indi rehistrado bangud dapat registered, may insurance kag may valid nga franchise ang isa ka salakyan para sa safety sang mga commuters.
Suno diri, wala na nila gin-insister nga mangdakop bangud wala man sila sang personnel kag indi man ini makahambal para sa bahin sang Land Transportation Office bangud may yara man sila sang ila kaugalingon nga mga layi kag pagsulundan.
Gindugang man sini nga indi sa tanan nga tion pahanugutan ang mga indi rehistrado nga magbyahe bangud sila ang maanad kag unfair ini sa mga nagcomply sa modernization program.
