Nagpanawagan ang secretary-general sang United Negros Drivers and Operators Center nga si Diego Malacad sa iya mga kaupod sa transport group nga hulaton anay ang effectivity date sang P12 nga regular minimum fare sa traditional jeepney antes manukot sang P12.
Sa interview sang Bombo Radyo kay Malacad, ila ginpasalamatan nga bisan paano, ginpaboran sang gobyerno ang hirit nga saka sa pamasahe bangud asud-asud ang saka sa presyo sang produktong petrolyo samtang tuman naman kagamay ang rollback.
Suno diri, bisan paano may panakip-butas ang LTFRB sa ginaagwanta sang mga driver nga mataas nga presyo sang gatong.
Indi naman nila mahangpan ang pagdugang sang 30 sentimos sa succeeding kilometer bangud mabudlay ini icompute.
Suno kay Malacad, hulaton nalang nila ang paggwa sang order nagikan sa LTFRB bangud magatake effect ini 15 dias halin sang ginpublish sa newspaper of general circulation ang fare matrix.
Magapagwa naman ang LTFRB sang fare matrix angot diri nga mangin giya sang mga commuters.
