Ginsentensyahan nga guilty sa “indirect contempt” si former Sugar Regulatory Administrator Hermenegildo Serafica ni Judge Walter Zorilla sang Himamaylan Regional Trial Court Branch 55 sa pag-issue sini sang SRA Memorandum Circular No. 11, series of 2021-2022, bangod sa pagbayolar sa writ of preliminary injunction nga una sini nga gin-issue.
Sa 11-page decision nga napetsahan Setyembre 26, ginsentensyahan ni Zorilla si Serafica sang straight penalty nga 15 ka adlaw nga pagkapriso kag pagbayad sang multa nga P30 mil.
Sa court decision, ginmando sang judge nga magpanaog sang warrant of arrest batok kay Serafica.
Makita sa court records nga si Serafica, nga anay administrator sa SRA, ang nag-issue sang Memorandum Circular No. 11, series of 2021-2022 ukon ang “Resumption of Implementation of Sugar Order No. 3” nga nagapahanugot sa importasyon sang 200,000 metric tons sang standard grade refined sugar kag bottlers grade refined sugar sang Mayo 4 subong nga tuig, apisar writ of preliminary injunction (WPI) nga gin-issue sang Himamaylan RTC sang Marso 2, 2022.
Sa pagpaathag ni Serafica sa Office of the Government Corporate Counsel (OGCC), ginpanindugan sini nga siya ang wala naglapas, wala nagpamatok ukon nagbayolar sa WPI sang korte kag siya ang nag-akto in good faith sang mag-issue sang MC 11 ang SRA, bangod ang SRA ang nagbase lang sa abiso sang counsel.
Bangod wala nalakip sa MC 11 ang Region 6, ang judicial region kun sa diin kabahin ang nasambit nga korte, ginapanindugan ni Serafica nga indi makabig nga disobedience, resistance ukon violation ang tikang sa WPI.
Sa ruling ni Zorilla, ginpahayag sini nga wala sa lugar ang panindugan ni Serafica nga sa sulod lamang sang 6th Judicial Region mapatuman ang preliminary injunction.
Pahayag sang hukom, nga nakahibalo na si Serafica, nga santo sa disquisition sa pag-issue sang preliminary injunction, ginapanindugan sang korte ang pagpamatok sang mga intervenors nga kinamatarong sang sugarcane farmers ukon sugar producers nga maprotektahan gikan sa pagpamentaha kag pagpamigos sa ila nga palangabuhian.
Ginpalab-ot sang mga ini sa korte nga may pagpanghangkat sa ila nga kinamatarong kag ini ang nagakabayolar sa idalum sang Sugar Import Program sang SRA nga nakapagkit sa Sugar Order No. 3.
Si Enrique Tayo, ang nagtindog nga petitioner, ang nagarepresentar sang Negros Occidental Federation of Farmers’ Associations.
