Automatic na nga indi magpadayon sa pagbaligya ang mga water refilling stations sa Bacolod City nga wala sang sanitary kag business permit.
Sa interview sang Bombo Radyo kay Bacolod City Councilor Kalaw Puentevella, chairman sang Commitee on Health sa Sangguniang Panlungsod, matapos ang pagpanglibot sang mga katapo sang City Health Office sa mga water refilling stations kag nadiskubrehan nga may 61 ka mga wala sang sanitary kag business permit, nadesisyunan sang City Legal Office sa rekomendasyon sang CHO nga indi dapat magpadayon sa pagbaligya ang mga ini tubtob sila ang makacomply.
Suno kay Puentevella, ang mga wala gid nagaubra sang tikang agud makacomply sa mga requirements ang posible nga marevoke ang ila mga lisensya kag permanente nga indi na maka-operate sa ciudad.
Suno sa iya, sini nga semana nagapadayon sila sa pagpalab-ot sa mga pumuluyo sang importansya sang matinlo kag safe nga tubig gani dapat lamang nga nakahibalo na ang mga water refilling stations nga kinahanglanon sang permit agud makasigurado ang mga pumuluyo nga nagabakal sa ila.
Suno sa konsehal, nagakadapat lamang nga indi magpadayon sa pag-operate ang mga wala pa sang permits bangud indi pag-risgo sang ciudad ang kabuhi sang mga Bacolodnon ilabi na sa karun nga may mga kaso sang food and water borne diseases sa Bacolod kag Negros Occidental.
Suno sa iya, indi lahog-lahog ang negosyo sa tubig bangud nagakatandog diri ang kabuhi sang isa ka persona.
