Nagalaom ang mga manugbaligya sang souvenirs nga makabawi na sa ila nga income subong nga ari sila diri sa ciudad sang Bacolod para sa MassKara Festival 2022.
Sa interview sang Bombo Radyo kay Jennifer Baldo nga nagabaligya sa Dalan Rizal, nagsugod ini sa pagbaligya sang Setyembre 28.
Si Baldo ang tumandok sang Tacloban, Leyte apang nagsaylo na ini sa Barangay 4, Bacolod City kag nagasaylo-saylo lang sila sang lugar kun sa diin may festival agud nga makabaligya.
Suno diri, ang iya baligya ang nagikan pa sa Cebu kag sila ang nagaubra sang ila ginadisplay nga mga souvenir items.
Suno kay Baldo, indi pa dako ang ila nga income bangud bag-o lang nagsugod ang ila pagbaligya.
Nagabaligya ini sang bracelet nga tag-P25 kag libre naman ang pagpabutang sang ngalan.
Nagabaligya man ini sang ref magnet, key chains kag kulintas kun sa diin may yara sang discount kun madamo ang baklon.
Ang key chain naman ang nagabili sang P20 kada isa kag may discount kun supot ang ginbakal.
Suno diri, indi pa madamo ang nagabakal bangud bag-o lang sila nagsugod sa pagbaligya.
Sanday Jen ang nagasaylo-saylo sang lugar sa kun sa diin may yara sang festival.
Sang nagtuhaw ang COVID pandemic suno sa iya, nagbaligya nalang ini online agud nga makakwarta gani apektado ang ila nga income ilabi na nga may yara sang bogus buyers.
Subong nga nagbalik na sa normal ang ila pagbaligya, wala ini nagalaom gid nga mangin pareho sa pre-pandemic years ang ila nga income bangud pigado ang pangabuhi.
