Magabayad sang P20 mil tubtob P25 mil kada bulan ang mga tenants sa Manokan Country agud maamat-amatan ang ila mga arrears magluwas sa P2,250 nga balayran sang mga ini sa renta santo sa compromise agreement nga ila ginpermahan kag ginpasa sa city government.
Suno kay Councilor Celia Flor, chairman sang Committee on Markets and Slaughterhouse sa Sangguniang Panlungsod, nag-istoryahanay sila sang mga vendors sang Setyembre 30 nga amat-amat na nga magpadulong sa City Treasurer’s Office kag mag-ubra sang compromised agreement agud indi sila masiraduhan apang wala ang mga ini nag-intindihanay.
Kahapon, matapos sang mga ini nakadihon sang compromised agreement, ginpanotaryohan ini, ginpasa sa City Administrator kag gintawgan ang City Legal Office agud liwat nga mabuksan ang ila mga store.
Suno sa iya, santo sa ila nahisugtan, ang mga vendors ang magabayad sang P20 mil tubtob P25 mil kada bulan para sa ila arrears magluwas sa P2,250 nga monthly rent sang mga ini.
Nagcommit man suno sa konsehal ang mga vendors nga sila ang magabayad kada adlaw para sa P2,250 nila nga balayran kada bulan.
Suno pa sa iya, kun mag-advance payment ang mga vendors sa ila monthly rent, sarang ang mga ini nga mahatagan sang 10 percent nga discount.
Makigkita si Flor sa mga vendors sa masunod nga semana agud madiskusyunan ang iban pa gid nga mga problema sa Manokan Country agud makabulig man ang ciudad.
