May mga ginpreparar nga programa kag pagkilala ang Deparment of Education – Division of Negros Occidental sa para sa mga manunudlo sa pagselebrar sang Teachers Month subong nga adlaw.
Sa interview sang Bombo Radyo kay Ian Arnold Arnaez, tagpamaba sang DepEd Division of Negros Occidental, may ginprepararnga “Guro Galaw Dance Showdown” ang mga student government officers kun sa diin ang mga manunudlo ang naghimo sang grupo kag nagvideo samtang sila ang nagasaot.
Ini ang ila ginpasa kag pagahusgahan kun sin-o ang magadaog.
May aktibidad man ang division office paagi sa Human Resource Department kun sa diin magahatag sang award sa mga magaretiro nga manunudlo kag service award sa mga nagaserbisyo sang masobra 25 ka tuig.
Kun indi mahingagaw subong nga adlaw suno kay Arnaez, may patigayunon man nga aktibidad sa katapusan sang bulan.
Nalakip na diri ang “Teacher Ikaw Na” kun sa diin magahatag sang pasidungog sa mga manunudlo santo sa ila ginpasa nga mga achievements sang recognitions.
Gin-athag naman sini nga indi holiday ang Teachers Day kag may klase sa gihapon apang kalabanan may ginapreparar nga programa ang student government para sa mga manunudlo.
Nagpanugyan man ini sa mga manunudlo nga apisar sang mga kabudlayan kag limitasyon, magpadayon lamang sa paghatag sang insakto nga serbisyo sa mga kabataan bangud ini ang ila ginsumpaan.
