Nagalain naman ang buot ni Jocelyn Gentulio, anay manunudlo sa Rizal Elementary School apang nagpatransfer sa Puentevella Elementary School bangud man sa pagpakahuya sa iya sang Principal nga si Mrs. Christina Gemora.
Sa interview sang Bombo Radyo kay Gentulio, anum ka tuig kag 11 ka bulan ini nga nagtudlo sa Rizal Elementary School apang nagpatransfer ini sa iban nga buluthuan kag isa sa rason amu si Gemora.
Suno sa iya, sang Hunyo 9, siya ang nakaleave gani wala ini sa eskwelahan sang naghambal sa flag ceremony, sa atubang sang mga manunudlo si Gemora, bitbit ang microphone, nga si Gentulio ang isa ka sutsutera, sawsawera kag eskandalosa.
Suno pa diri, si Gentulio ang kahuy-anan sang bilog nga buluthuan kag nahuy-an ang Rizal Elementary School sa bilog nga division.
Sa nagakalab-ot ini kay Gentulio, siya ang personal nga nagpadulong kay Gemora agud mag-istorya kag namangkot kun ngaa amu to ang ginhimo sa iya.
Nagsabat lamang ang principal nga “Yes, indi matuod haw?”.
Suno kay Gentulio, siya ang daw mahibi samtang nagapamati sa ginapanghambal sang principal bangud wala ini nakahibalo sang iya sala.
Suno pa diri, pwede man lang siya mapatawag sa Principal’s Office kag indi pagpakahuy-an sa kadam-an.
Suno sa iya, tuman kasakit kag nagtuga ang pagpakahuya sa iya ni Gemora sang emotional torture kag trauma.
Ginaalegar nga ginpahog naman ni Gemora si Chona Cabrera, manunudlo man sa Rizal Elementary School nga ini ang iya kasuhan kag ipapriso matapos ini nagpadulong sa opisina ni Assistant Schools Division Superintendent Reynaldo Gico agud kuntani magpatransfer.
Suno kay Cabrera, siya ang ginpatawag sa opisina ni Gemora kag gin-intimidate nga ipapriso bangud siya ang ginpakahuy-an sa division.
Nagpakitluoy pa ini sa principal nga indi bangud mabirthday pa iya bata kag siya ang ginsabat lamang kun gusto niya magbirthday ang iya bata nga yara siya sa prisuhan.
Suno diri, wala ini maayo nakahibalo sa legalities gani siya ang nasakitan gid sa ginhimo ni Gemora.
