Ginapasalamatan sang pamunuan sang 303rd Infantry Brigade sang Philippine Army ang pagpirma ni President Ferdinand “Bongbong” Marcos Jr. agud mangin ang sim registration bill.
Sa interview sang Bombo Radyo Bacolod kay Brigadier General Inocencio Pasaporte, commander, 303rd Infantry Brigade sang Philippine Army , welcome sa Philippine Army ang pagpirma sang presidente agud mangin layi ang sim registration bill.
Suno kay Pasaporte, sa bahin sang security sector nga kinahanglanon gid ang pagrehistro sang subscriber identity module (SIM) cards.
Suno diri, dako nga bulig sa security sector ang pagparehistro sang sim card bangud paagi diri mahibaluan kun sin-o ang nagahimo sang indi maayo.
Suno diri ang Communist Party of the Philippines (CPP), New Peoples Army (CPP- NPA) ang nagagamit sang madamo nga sim cards agud maprotektahan man sila nagikan sa malain nga ginapanghimo sang mga ini kaangay sang pagpadala sang sulat sa mga nagapanag-iya sang mga heavy equipments nga ginagamit sa proyekto sang gobyerno kag sa tion nga indi magpasugot ang ginpadal-an sang sulat ginasunog sang mga ini ang heavy equipments ukon bisan ano man nga ginapanag-iyahan nga propedad sang ila target.
Suno sa commander sang 303rd Infantry Brigade paagi sa mandatory sim card registration mapunggan na ang ginahimo kalainan sang NPA.
Nagapati man si Pasaporte nga nag-agi sa proseso antes ginpirmahan agud nga mangin layi ang sim card registration act.
Ginpahayag man sini nga indi man maabusuhan ang kinamatarong sang mga sim card holder sa privacy bangud may yara man sang court order nga kinahanglanon antes ma-access ang data kag iban nga impormasyon sa sim cards.
