Siyam na ang kumpirmado nga kaso sang cholera sa Bacolod City gani liwat nga nagpahanumdum ang City Health Office nga mangin matinlo sa palibot kag sa panggawi.
Sa data sang CHO, nakarekord ang Barangay Mansilingan sang isa ka kaso sang cholera; duha sa Sum-ag; isa sa Alijis; isa sa Tangub; duha sa Granada; isa sa Handumanan; kag isa sa Barangay 40.
Wala naman sang fatalities sa cholera ang ciudad.
Suno kay City Health Officer Dr. Carmela Gensoli, yara sa karun sa alert level ang ciudad kag agud malikawan ang mga food and water borne diseases dapat nga maggamit sang matinlo nga tubig, mag-obserbar kag magpractice sang sanitation kag proper waste disposal kag magmintinar sang maayo nga hygiene.
Suno kay Gensoli,dapat ang ginainom nga tubig ang matinlo kag apisar nga ini ang nagikan sa mga water refilling stations, dapat may yara ini sang updated bacteriological monitoring sang water and permits.
Siguruhon man nga wala sang buho ang mga water pipes kag hose nga ginalabyan sang tubig nga ginagamit.
Ang mga source ang tubig ang dapat 25 meters ang kalayuon sa mga sources sang contaminants kaangay sang banyo kag basurahan.
Kun nagasuprer sang irregular nga bowel movement nga may pagpalanuka, dapat nga magkonsulta sa doktor.
Nagpanugyan man ang City Health Office nga likawan ang dehydration.
Samtang sa data sang CHO, as of October 17, 257 na ka mga water refilling stations ang na-inspect kag 135 diri ang may yara sang permit; 118 ang wala; 29 ang with compliance; kag apat ang ginsiraduhan.
