Antes magtambong sa Bacolod Masskara Festival 2022, si President Ferdinand “Bongbong” Marcos Jr. ang nagpanguna sa pagpanagtag sang government assistance sa nagkalain-lain nga sektor sa Talisay City, Negros Occidental.
Gindaho sang Chief Executive ang Assistance to Individuals in Crisis Situation (AICS) gikan sa Department of Social Welfare and Development (DSWD) nga nagabalor P5,000 tubtob P10,000 sa 100 nga mga recipients.
Samtang, ginturn-over man sang Department of Agriculture (DA) ang mock checks sa anom ka farmer organizations sa balor nga P88 million sa idalum sang Philippine Rural Development Project.
Ang DA ang nagdistribute man sang binhi sang humay sa 100 ka mga mangunguma, isa ka unit sang corn mill kag tatlo ka unit sang incubator.
Sa speech ni Presidente Marcos, ginpahayag sini nga bangod sa pagsaka sang bili sang halos tanan nga balaklon, ginatinguhaan nila nga bisan paano makahatag sang bulig sa nagkalainlain nga sektor.
Nagpasalig ang Presidente nga samtang nagakinahanglan sang bulig ang mga pumuluyo, pagahimuon man sang gobyerno ang masarangan agud nga makabulig.
Aminado si Presidente Marcos nga maayo pa ang kahimtangan sang Pilipinas, apang bangod sa kapigaduhon nga nagaka-eksperyensahan worldwide partikular na sa mga kaalyado sang pungsod, ini ang naga-epekto man sa pungsod.
Dugang pa sini nga madamo man sang kinahanglan pa nga kay-uhon sa bahin sang industriya sang kalamay kag ginapasalig sini nga makalab-ot sa mga pumuluyo kun ano ang nagakaigo.
Pahayag sang Presidente nga ini ang wala natapos sa industriya sang kalamay kundi kasubong man sa mga agriculture products.
Pasalig sini nga padayunon nila ang pagpasanyog sang ekonomiya tubtob nga indi na magakinahanglan sang kaangay nga bulig ang mga pumuluyo.
Apang suno kay Presidente Marcos, samtang may-ara pa sang nagakinahanglan sang bulig, yara lamang ang gobyerno agud magbulig.
