Patay ang isa ka lalaki matapos ginluthang samtang nagatambong sa birthday sa Balansag Bobong, Barangay Minapasuk, banwa sang Calatrava sang Sabado sang gab-i.
Ginkilala ang biktima kay Remart Rebucas, 26-anyos, sultero kag residente sang Spur 2, Barangay Minapasok, banwa sang Calatrava kun sa diin nakaagom sang igo sang bala nga gintunaan sang iya kamatayon.
Samtang, ang suspek ang ginkilala kay Junjun Aligioho, 27 anyos, kag residente sang pareho nga lugar.
Sa interview sang Bombo Radyo Bacolod kay Police Major Lumyaen Lidawan, hepe sang Calatrava Municipal Police Station, ginalantaw nga crime of passion ang natabo nga insidente bangud ang suspek ang ginbulagan sang iya live-in partner kun sa diin nag-apas sa Manila agud mag-upod sa biktima nga nagatrabaho bilang security guard.
Suno kay Lidawan, nagpauli ang biktima sa Calatrava agud magbakasyon para iselebrar ang kaadlawan sini kag agud magtambong man sa kaadlawan sang iya lola sang Sabado, November 5 kun sa diin nagkadto man ang suspetsado dala ang wala matumod nga armas-luthang kag gintiro ang biktima.
Gindala pa sa Alfredo Marañon District Hospital si Rebucas apang gindeklarar ini nga dead on arrival.
Suno sa hepe, mahimo nga bangud sa kaakig sang suspek kasubong man pagpangimon ang rason sa nagluntad nga krimen.
Padayon ang hot pursuit operation sang Calatrava Municipal Police Station matapos nga nagpalagyo ang suspetsado.
