Nagalaom ang presidente sang Teachers League sang Rizal Elementary School nga indi nila maaguman sa masunod nga principal ang pagtrato nga ginhimo ni Mrs. Christina Gemora nga natalana na nga isaylo sa lain nga eskwelahan kasunod sang reklamo sang mga manunudlo nga mahilig ini magpakahuya sa manunudlo nga may kapaltahan.
Sa interview kay Jonna Marie Leal, indi matungkad ang ila pagpasalamat nga nahimuan na sang tikang ang ila hingyo kag pangamuyo nga masaylo sang Division Office si Gemora.
Nagalaom ini nga maaguman nila sa masunod nga administrasyon ang fairness.
Kun may problema sa isa ka manunudlo suno kay Leal, kuntani ipatawag ini kag istoryahon sang pribado nga indi na maglusot sa iban bangud amo ini ang nagakaangay nga himuon sang isa ka principal.
Aminado ini nga may mga tinion nga may kapaltahan ang manunudlo apang willing man sila nga magkambyo para sa kaayuhan.
Nagalaom man si Leal nga mabalik na ang maayo nga pagtinamdanay sang mga manunudlo sang Rizal Elementary School nga amo ang nagapangibabaw halin sadto.
Si Leal ang 23 na ka tuig sa serbisyo gani siya ang nakibot sa pagtrato sa ila ni Gemora kag wala nagdalom ang problema kaangay sang ila reklamo kay Gemora.
Sa karon, si Gina Ong ang officer-in-charge sang Rizal Elementary School kag wala pa nakabaton sang impormasyon ang mga manunudlo kun sin-o ang masunod nga principal sang RES.
