Nagalaom man ang presidente sang Bacolod City Public School Teachers Federation nga magabalik naman ang harmonious relationship sang mga manunudlo sang Rizal Elementary School sa karon nga nasabat na ang ila hingyo nga isaylo sa iban nga eskwelahan ang principal nga si Mrs. Christina Gemora.
Sa interview sang Bombo Radyo kay Mr. Richard Gelangre nga amo man ang principal sang Bacolod City National High School, ginakabig nga isa sa dako kag kilala nga eskwelahan ang Rizal Elementary School sa siyudad sang Bacolod.
Ginalauman ni Gelangre nga magabalik ang tanan sa pag-intindihanay.
Ang pagreshuffle sang mga principal suno kay Gelangre ang mangin isa ka pamaagi nga magsugod sila liwat sang pagbag-o.
Suno kay Gelangre, bilang isa man ka principal, ginalantaw niya nga isa ka oportunidad ang pagbag-o sang mga principal sa mga buluthuan amo man nga may pagbag-o sa leadership nga ginapangayo sang mga manunudlo.
Gani iya ginpangayo nga magkaisa ang tanan sa pagtrabaho nga may makuha nga kaalam ang mga estudyante.
Suno kay Gelangre, nagakaangay gid nga hatagan sang tsansa si Gemora bangud kada tawo ang may kahigayunan nga magkambyo sang paminatasan.
