Ginalantaw sang Bacolod Police Station 1 nga mahimo daan nga hiligut-anon ukon old grudges ang motibo sa pagpatay sa barangay tanod sang Barangay 34 samtang ini ang nagapamunit sa seawall sa Purok Malipayon, Barangay 35, Bacolod City kahapon sang udto.
Ang biktima ang ginkilala nga si Nilo Payo, residente sa Purok Million Flower, Barangay 34, Bacolod City.
Si Payo ang nakaangkon sang igo sang bala sa likod malapit sa tangkugo kag isa sa hawak.
Suno sa witness, yara na nga daan ang biktima sa lugar agud magpamunit sang isda halin kahapon sang aga samtang nagtabo naman diri ang apat pa sini ka kaupdanan.
Alas-12:00 sang udto, nakabati na lamang ang mga witness sang tatlo ka lupok sang armas luthang.
Naglabay pa sa ila nga likod ang duha ka mga lalaki nga gina-alegar suspetsado sa krimen.
Lunsay nakabonnet ang duha ka suspetsado kag lunsay nakashorts sang itom, samtang nakaputi nga tshirt ang isa kag nakajacket naman ang isa pa.
Gilayon ang mga ini nga nagsakay sa magkatuhay nga motorsiklo kun sa diin ang isa ka motorsiklo ang itom samtang ang isa ang itom man ang kolor apang may mga design nga blue, kag gilayon ang mga ini nga nagpalagyo sa lugar.
Sa interview sang Bombo Radyo kay Police Major Ramel Sarona, station commander sang Bacolod Police Station 1, blangko man ang pamilya sang rason kun ngaa ginpatay si Payo.
Ginalantaw sang station commander nga mahimo may nagadumot sa biktima kag ginkadtuan ini sa seawall agud nga tiruhon.
Santo sa ila nga pagpangusisa, si Payo ang nakagwa sa prisuhan sang tuig 2007 matapos ginkasuhan sang murder matapos niya ginpatay ang iya bilas apang madugay na nga tinuig ang nakaligad humalin sang nakomiter niya ang krimen.
Suno kay Sarona, .45 caliber pistol ang armas nga gingamit sa pagpatay kay Payo.
