Magasugilanon liwat si Bacolod City Mayor Alfredo Benitez sa pamunuan sang Land Transportation Franchising and Regulatory Board kag Land Transportation Office agud iduso ang mga provision nga luyag malakip sang grupo sang traditional jeepney operators kag drivers sa Bacolod sa Public Utility Vehicle Modernization Program.
Sa press conference, ginpahayag ni Benitez nga nalakip sa mga provision nga tuyo sang transport group nga malakip sa guidelines amo ang sole proprietorship para sa pag-avail sang modern jeepney sa baylo nga magtukod sang cooperative ukon corporation kag ang pagbakal sang mas barato nga modern jeepney.
Suno kay Benitez, luyag sini nga matigayon kuntani ang transition phase antes pa man magbalik ang dinakpanay sa karsada.
Pero kun may grupo nga makakuha sang temporary restraining order batok sa pagpatuman sang PUV modernization program, mahimo nga mapaiway anay ang enforcement.
Ginabulubanta kapin sa 3,000 ka mga driver kag operator sang traditional jeepney sa Bacolod ang mawad-an sang palangabuhian kun istrikto nga mapatuman ang modernization program.
