Natalana nga maghampang ang 44 anyos nga Bacolodnon sa palaabuton nga International Spartan Race sa Abu Dhabi, United Arab Emirates (UAE) sa maabot nga Desyembre 3 kag 4.
Suno kay Karen Ann Sison, ang Spartan Race ang isa ka pattern military training kun sa diin ginalakipan sang sprint kag pila ka mga obstacles.
Suno diri ang 5 Kilometer Spartan Race ang ginalakipan sang ginsamo nga dalagan kag mga obstacles kaangay sang paghakwat sang Atlas Ball, isa ka semento nga ginhurma nga bola nga nagabug-at sang 50 kilos kag pagahakwaton sang mga ini sang 100 metros; paghakwat sang bundling sa 300 metros; pagtaklas sa isa ka pader; kag pagkamang sa idalum sang barb wire.
Suno diri, wala sang kaangay nga pattern military training sa bacolod city kundi circuit type lamang.
Paathag sini nga agud ma-qualify sa International Competition, kinahanglan nga makasulod sa Top 3 sa National Competition kag makasulod sa Top 5 sa Regional Area ukon sa Asian category.
Suno kay Sison, siya ang nag-second place sa kompetisyon nga ginpatigayon sa Bohol kag ang first place ang nagikan sa Cebu.
Siya ang nangin pang-apat naman sa Regional competition.
Samtang wala naman sang gender category sa hampang kundi age category lamang kag siya ang nagpasakop sa 40-44 age group.
Suno diri, sadto nag-umpisa ini sa barbell tubtob sa nagshift sa cross feet kag karun sa spartan race.
Si Sison ang nagasuprer sang kabudlayan sa paghambal bangod sa siya ang gintawo nga may underdevelop ang uvula, sa bahin sang alingagngag kun sa diin siya ang nakapaidalum lamang sa operasyon sang naga-edad na sang 28.
Ginpakigbahin man sini ang mga nangin kabudlayan bangod sa kondisyon, kun sa diin siya ang nagakahangawa sa mga deskriminasyon.
Dugang pa sini nga bisan sa pagpanaog sa Jeep nagahulat nalang ini nga may iban nga magpanaog malapit sa iya destinasyon kag didto nagadungan agud indi na makahambal kag mahusgaran.
Apisar sa kabudlayan, nagpakabakod si Sison sa bulig man sang iya pamilya.
Siya ang nag-umpisa naman sa pagtrabaho sa gym sang naga-edad 20 anyos bangod malayo nila nga himata ang tag-iya sang gym.
Nakasulod ini sa pagtraining sang edad 24 ukon 25 anyos bangod may naghalin nga atleta gani siya ang ginbulos ilabi na nga nakita nga siya ang aktibo.
Paathag sini nga bangod sa siya ang nagatrain, ginatun-an man sini ang mga pamaagi agud mas matudlo sang maayo sa mga nagagym.
Suno kay Sison, bangod siya ang may deperensya sa public speaking, ginpangita sini kun diin siya maga-excell kag amo ang sports.
Sa palaabuton nga hampang sa UAE, ginalantaw sini nga kabudlayan amo ang hangin kag balas bangod sa desyerto pagabuhaton ang kompetisyon.
Gani bilang preparasyon, siya ang nagatraining man sa higad sang mga baybayon.
