Ginpapasa naman sang pinuno sang Bacolod City Disaster Risk Reduction and Management Office (CDRRMO) sang incident report ang team sang responders nga nagrescue sa biktima nga nakabunggo sa replica sang Bacolod City Government Center sa Bacolod City Public Plaza kun sa diin nahulog ini sa longboard samtang ginarescue.
Sa interview sang Bombo Radyo Bacolod kay Dr. Ana Maria Laarni Pornan, ginpasubmit na sini sang incident report ang team agud mahibaluan kun ano gid ang natabo bangud second hand information na ang nabaton sini.
Ginpareview man sini sa operations head ang video kag personal man nga ginlantaw ni Pornan ang video nga nagapakita sang pagkahulog sang pasyente nga si Melfred Sepida sa longboard.
Suno kay Pornan, ginaremind man nila sang masami ang mga responders nga ibutang gid sa siguro ang ginahimo sa tion nga magresponde sa mga insidente.
Nagpanugyan man ini sa mga rescuers nga siguruhon gid ang safety sang mga ginarespondehan kag indi magdali agud nga indi madisgrasya kag malikawan ang kaangay nga insidente.
