Duha ka mga ginaalegar miyembro sang New People’s Army ang patay kasunod sang engkwentro batok sa mga suldado sa Sitio Makilo, Barangay Camansi, Kabankalan City, Negros Occidental pasado alas-2:00 kaina sang kaagahon.
Sa interview sang Bombo Radyo kay 303rd Infantry Brigade commander Brigadier General Inocencio Pasaporte, nakabaton sang report ang 94th Infantry Battalion nga may presensya sang armado nga mga tawo sa lugar gani nagpatigayon sang verification kaupod ang 47th IB.
Pag-abot sa lugar, nakasugata sang mga ini ang ginabanta 10 ka armado nga mga lalaki gani nagluntad ang engkwentro.
Matapos ang napulo ka minutos nga pagbayluhanay sang lupok, duha ka bangkay sang mga rebelde ang narecover.
Nakarecover man sang mga suldado sang pila ka armas nga ginalakipan sang KG9 kag caliber .45 pistol kag subersibo nga mga dokyumento.
Wala naman sang napilasan sa mga suldado.
Suno kay Pasaporte, napapanaog na ang bangkay sang mga rebelde kag gindala na sa punerarya sa Kabankalan agud nga maidentify sang ila nga pamilya.
Suno sa Army official, ang grupo nga naengkwentro sang mga suldado kaina amo man ang involved sa nauna nga encounter nga nagluntad sa Barangay Carabalan, Himamaylan City kag nagtabok sa ciudad sang Kabankalan.
Suno kay Pasaporte, sakop sang 94th IB ang pito ka mga barangay sa ciudad sang Kabankalan nga sakop sang 94th IB gani nagtingob ang pwersa nila sang 47th IB.
