Ginpahanumdom sang 10th Placer sa Civil Engineering Licensure Examination nga ang pagpabudlay sang mga professor sa eskwelahan ang para man sa pagpreparar sa mga estudyante agud mangin competent sa ila nga patag.
Suno kay Engr. Jefferson Cafino, nga ang ginapinsar lamang sini sa pagkuha sang Board Exam amo ang makapasar kag wala ginapinsar ang pagsulod sa Top.
Wala man sini ginalauman nga mangin Top 10 bangod aminado ini nga tuman ka competitive ang mga exam takers ilabi na ang mga tinuig na nga nagpreparar, samtang siya ang anom ka bulan pa lamang ang preparasyon.
Si Cafino ang fresh graduate sa Carlos Hilado Memorial State University (CHMSU).
Aminado man ini nga indi siya achiever sang elementary kag high school apang siya ang kabahin sa honor students tubtob nga siya ang nagpabaya sa pagtuon sang Senior Highschool.
Kabahin sa mga nagtuga sang nasambit nga gawi amo ang pagbulagay sang iya ginikanan, mobile games kag ang sobra-sobra nga confidence sa ikasarang.
Suno diri, luyag kuntani sini nga magkuha sang Electronic Communication Engineer (ECE) apang siya ang wala nakapasar sa entrance exam.
Didto sini narealisar nga siya ang indi tuman ka alam gani kinahanglan sini magtuon sang maayo kag sunod sini nga ginpili ang kurso nga Civil Engineering bangod may pakaisa man ini nga Civil Engineer nga mahimo makagiya sa iya.
Aminado ini nga high standards ang pagtudlo sa CHMSU kun sa diin sa 100 nga mga nag-enroll sa ila nga batch, 12 lang sila ang nakatapos.
Nagapati naman ini nga nadelay lang ang iban nila nga kaupod bangod sa kabudlayan sa pagtuon.
Paathag sini nga ang mataas nga standard sang eskwelahan ang nagatuga man agud nga halos tanan sa mga ini ang handa na sa pagkuha sang board exam sa paggradwar.
Nagdangat sa 58 ang mga nagkuha sang board exam gikan sa nagkalainlain nga batch sang CHMSU kun sa diin 50 ang nakapasar.
Pahanumdom naman ni Cafino sa mga estudyante nga mangin consistent sa pagtuon samtang dapat ang focus ang indi lamang para sa rankings kundi agud nga mag-improve.
