Ginakalipay sang tagreklamo kag nagpasaka sang kaso batok kay Punong Barangay Noli Villarosa sang Barangay Tangub, Bacolod City ang ginpagwa nga dismissal order sang Office of the Ombudsman.
Una na nga nagpahayag ang kampo ni Villarosa nga magafile ini sa gihapon sang motion for reconsideration sa Court of Appeals.
Nahibaluan nga nag-ugat ang reklamo sadtong 2019 sang ginbakbak ang portion sang kudal nga nasakupan sang private property ni Candido Nessia Medalla Jr. apisar nga gin-abisuhan na sini ang team sang barangay nga nagapatigayon sang clearing operation sang road obstruction nga indi pagtandugon bangud yara pa ini nakasulod sa propedad sini sa Barangay Tangub, Bacolod City.
Sa interview sang Bombo Radyo kay Medalla, ginakalipay sini nga nakapagwa na sang desisyon ang Office of the Ombudsman kag mangin anuman ang outcome, ginakabig sini nga iya na nabaton ang hustisya.
Suno diri, kun anuman nga remedy ang himuon sang kampo ni Villarosa, iya na ini diretso apang sa iya bahin, magaselebrar na ini bangud siya vindicated kag abanse na gamay.
Ginpahayag man sini nga dapat gilayon ini nga himuan sang tikang sang Department of the Interior and Local Government (DILG) kag indi na pagpahanugutan si Villarosa nga makapungko bangud madamo ini sang mahalitan.
Ginpanginwala man sini kag gintawag nga kabutigan ang istorya nga nagalapta nga siya ang ginbayaran kag nagbaton sang P5,000 kag ginpahayag nga indi sini pag-ikompromiso ang iya pride kag honor para sa kwarta.
