Pilason ang duha ka bystander matapos nga pagpangluthang sang isa ka lalaki sa bahin sang Circumferential Road, malapit sa Purok Sawmill, Barangay Bata, Bacolod City kahapon sang aga.
Sa interview sang Bombo Radyo kay P/Capt Armilyn Vargas, station commander sang Bacolod Police Station 3, naglagsanay ang duha ka persona gikan pa sa Purok Sawmill tubtob sa nagdangat sa circumferential road.
Ang naglagsanay ang wala naman ginhingadlan sang hepe, nga santo diri parehas may daan na nga record sa estasyon may kaangtanan sa iligal nga droga kag pila ka mga kinagamo.
Pahayag ni Vargas nga sang magdangat sa lugar, nakit-an sang suspetsado ang blinker sang Patrol Car sang kapulisan gani nag-untat na ini sa paglagas kag didto na naghunos sang armas luthang kag nagpalupok.
Wala sini ma-igo ang iya nga ginalagas, sa baylo, duha ka mga bystander ang nasamaran.
Ang mga biktima ang ginkilala nga sanday Jade Rey Apgel, 20 anyos residente sa nasambit nga Purok kag Norma Fortogalete, 78 anyos, balo kag residente sa Purok Nara, sa nasambitan man nga Barangay.
Padayun naman ang pagpatigayon sang hot pursuit operation sang Bacolod Police Station 3 sa suspetsado.
Nasugilanon naman sang imbestigador sa kaso ang pila ka mga witness kag ini ang nagatinguha nga matumod ang kabangdanan sang komosyon.
Dugang pa ni Vargas nga nagapangita man ang mga ini sang CCTV footage nga mahimo nakacapture sang natabo nga lagsanay kag pagpangluthang.
Sa karun, wala pa nakapagwa sang kongkreto nga pahayag ang mga biktima nga nakaangkon sang samad sa butkon kun ang mga ini ang magapasaka sang kaso.
Wala naman sang narecover nga armas luthang sa crime scene apang nagapati si Vargas nga sulpak ukon improvised firearms ang gingamit sang suspetsado.
