Arestado ang 36-anyos nga public utility jeepney driver matapos nakuhaan sang sachet sang shabu sang ini ang nagsulod sa headquarters sang Bacolod City Police Office (BCPO).
Ginkilala ang suspetsado kay Willie Satoc Jr., 36-anyos, residente sang Purok Bulak Eroreco, Barangay Mandalagan, Bacolod City kag driver sang PUJ nga may routa Bata-Libertad.
Sa interview sang Bombo Radyo kay Satoc, magapadulong ini kuntani sa opisina sang Bacolod Traffic Authority Office (BTAO) agud kuhaon ang iya lisensya matapos ini ang nakumpiskar sang tinalikdan nga semana matapos ini nakakomiter sang bayolasyon.
Nakasulod na ini sa gate sang BCPO apang pagkuot sini sa iya bulsan, nahulog ang isa ka sachet sang suspected shabu kag ini ang nakit-an sang mga pulis.
Gin-ako naman sini nga siya ang nagagamit sang illegal nga druga apang wala ini nagabaligya.
Suno sa iya, dugay na ini nag-untat sa pagsuyop kag sang damlag lamang nagbalik sa bisyo agud makabulong sa iya kakapoy.
Suno diri, sa Purok Langis, Barangay Banago ini nagakuha sang supply sang illegal nga druga.
Ang nakumpiskar nga illegal nga druga ang nagabug-at sang 0.005 grams kag may estimated market value nga P500.
