Matapos ang long week-end kasunod sang holiday season, gindagsa sang mga pasahero ang Bredco port para magpauli sa Iloilo kaina sang aga.
Sa interview sang Bombo Radyo Bacolod kay Commodore Danyl Yap, pinuno sang Coast Guard Auxilliary, kaupod ang staff kag officers sang Coast Guard Auxilliary naghatag sila sang assistance sa mga nagdagsa nga mga pasahero kag nagapatigayon man sila sang Oplan Byaheng Ayos;Pasko 2022 kag alas 7:00 ang takna sa aga nag-umpisa na sa pagdamo ang mga pasahero.
Ginpahayag man ni Yap nga gin-abisuhan sini ang mga pasahero nga indi lang magsalig nga tanan sila ang makasakay sa isa lang ka barko bangud may yara man ini sang ginasunod nga maximum capacity nga mahimo ikarga ang isa ka barko kag ginahatagan sang Roro ang cargoes gani kalabanan sang ginasakay ang mga salakyan nga magatabok sa Dumangas, Iloilo.
Nagdamo pagid ang mga pasahero sang RoRo bangud mas barato ang ila nga pamasahe kumparar sa fastcraft.
Ginpahayag ni Yap nga ginapili sang kadam-an ang RoRo para may mabilin pa sila nga inugpanyaga nagikan sa ila pamasahe.
Samtang, hugot man nga ginabantayan sang task force-African Swine Fever nga yara sa puerto nga wala sang makasulod nga karne sang baboy sa syudad sang Bacolod kag probinsya sang Negros Occidental agud malikawan nga mahalitan sang virus ang ginahalungan nga swine industry.
