Patay ang isa ka miyembro sang New People’s Army sa nagluntad nga engkwentro sa tunga sang 94th Infantry Battalion sang Philippine Army kag katapo sang Himamaylan City Police Station sa Sitio Maliko-liko, Barangay Carabalan, Himamaylan City, Negros Occidental.
Sa interview sang Bombo Radyo Bacolod kay Col. Michael Samson, acting commander sang 303rd Infantry Brigade sang Philippine Army, nag-umpisa ang engkwentro alas 6:30 ang takna kaina sang aga kag naglawig sang lima ka minutos.
Naengkwentro sang tropa sang 94th Infantry Brigade kag mga kapulisan ang kapin napulo ka miyembro sang Central Negros 2.
Suno kay Samson, patay ang isa ka katapo sang CN2 apang wala pa sang identity samtang wala naman sang nasamaran sa tropa sang gobyerno.
Ang engkwentro ang kasunod man sang validation nga ginpatigayon sang tropa sang gobyerno matapos ang nabaton nga impormasyon nagikan sa mga residente nga may presensya sang armado nga mga tawo sa lugar.
