Ginpahayag sang provincial director sang Department of Trade and Industry nga may adjustments sa presyo sang basic kag prime commodities sa katapusan sang Enero.
Sa interview sang Bombo Radyo kay Rachel Nufable, sa ila monitoring sa karun sa mga supermarkets kag grocery stores, wala man ang mga ini nagalapaw sa suggested retail price.
Suno sa iya, sini nga tuig, may request nagikan sa Manila nga pasakaan ang presyo sang mga prime commodities kag sa karun ginatun-an pa ang rason kun ngaa sila ang nagrequest sini.
Suno diri, sa karun wala pa sang bag-o nga SRP apang lauman nga sa katapusan sang Enero, magasaka ang presyo sang mga basic kag prime commodities apang indi gid man tuman kataas kag posible nga yara lamang sa 3-10 percent ang increase.
Nagpanugyan naman ini sa mga pumuluyo nga indi magpanic buying kag mangin vigilante sa pagtan-aw sang presyo kasubong man sang expiration date sang mga produkto.
Gin-abisuhan man sini ang mga konsumedor nga magpili sang mga brands sang produkto nga nagakaigo sa ila nga budget.
