Nadugangan ang bayolasyon sa International Humanitarian Law sang katapo sang Central Negros 1 sang New People’s Army (NPA) matapos nga ila ginpatay ang isa ka Barangay Kagawad sa Barangay Guba, Vallehermoso, Negros Oriental.
Ang biktima ang ginkilala nga si Cerilo Balasabas, Barangay kagawad sa nasambit nga lugar.
Suno kay Colonel Michael Samson, Deputy Commander sang 303rd Infantry Brigade, ginpatay sang katapo sang NPA ang kagawad kun sa diin gilayon man nga ginpadulungan sang 62nd Infantry Battalion ang area sa Sitio Cambawgon, Barangay Trinidad, Guihulngan City, kun sa diin may nagluntad nga encounter batok sa mga NPA.
Suno diri, apat ka miyembro sang Central Negros 1 ang ila na-atubang.
Nagdugay sang kapin lima ka minutos ang encounter kag wala naman sang may nasamaran sa duha ka bahin.
Narekober sa area ang isa ka 45 calibre pistol, isa ka magazine kag anom ka serviceable ammunitions.
Pahayag ni Samson, ila ginasiguro ang siguridad sang mga pumuluyo kag ila man pagahatagan sang hustisya ang pagpatay sa kagawad.
Mensahe sini sa mga NPA nga sa kaangay nga buluhaton, ang mga pumuluyo gid lamang ang biktima.
