Ginpasalig sang City Anti-Drug Abuse Council sang Bacolod nga ginapasanyog pa gid sang ciudad ang kampanya batok sa illegal nga druga.
Sa interview sang Bombo Radyo kay Retired Brigadier General Primitivo Tabujara, coordinator sang City Anti-Drug Abuse Council sang Bacolod, nagpatigayon sang preparatory audit sa tanan nga 61 ka mga barangay sa ciudad kun sa diin ginlantaw kun may monthly activity ang mga ini angot sa drug clearing program.
Suno kay Tabujara, 14 ka mga barangay sa ciudad ang drug-cleared apang indi 100 porsyento nga cleared sa illegal nga druga ang mga ini kundi nagapadayon ang programa sa barangay kun sa diin ginarekomendar sa City Health Office ang mga drug users agud nga mapaidalom sa rehabilitation.
May close coordination naman ang mga barangay officials sa mga law enforcers kaangay sang kapulisan kag katapo sang Philippine Drug Enforcement Agency agud madakop ang mga nagaduso sang illegal nga druga.
Ginalantaw naman ni Tabujara nga mahimo pamukaw lamang sa sosyodad ang utod nga kamot nga ginbilin sa Purok Kagaykay, Barangay 2 tinalikdan nga semana kag pahanumdom sa mga pumuluyo nga magbulig sa pagtapna sang illegal nga druga bangud nagahalit ini sa mga kabataan.
Nahibaluan nga wala gihapon sang identity ang gin-utdan sang kamot.
Naghingyo naman si Bacolod City Mayor Alfredo Benitez sa CADAC nga tutukan ang anti-illegal drug campaign sang mga kabarangayan sa ciudad nga ini ang mag-improve kag makapaidalom naman sa drug rehabilitation program ang mga drug personalities nga nagsungka paagi sa Oplan Tokhang.
Sa bilog nga Rehiyon 6, ang ciudad sang Bacolod ang may pinakadiutay nga barangay nga gindeklarar nga drug-cleared.
