Nagnubo ang numero sang mga complaints nga nagakabaton sang Department of Public Services humalin sang gin-implementar ang bag-o nga zonal map nga may color coding sumugod sang Lunes.
Madumduman nga nagdihon sang bag-o nga zonal map nga may color coding ang DPS para sa pagpangolekta sang garbage haulers sang basura sa ciudad.
May yara sang apat ka color coding nga ginalakipan sang pula, blue, yellow kag green.
Ang pula ang gintalana sa numbered barangays kun sa diin ginlakipan sang Barangay 1 tubtob Barangay 41 kag ang mga mainroads nga ginalakipan sang Araneta kag Lacson kun sa diin adlaw-adlaw ang pagpangolekta sang basura.
Ang paghakot sang basura ang blue zone ang nakaschedule sa Lunes kag Huwebes kag sa idalom sini ang Barangay Banago, Bata, Villamonte, Granada kag Alangilan.
Sa idalom naman sang yellow zone nga nakaschedule sa Martes kag Biyernes ini ang ginalakipan sang Barangay Estefania, Taculing kag Mansilingan samtang sa green naman nga nakaschedule sa Miyerkules kag Sabado ang pagpanghakot sang basura ang ginalakipan sang Barangay Sincang, Tangub, Pahanocoy, Punta Taytay, Sum-ag, Cabug, Alijis, Felisa kag Vista-Alegre.
Sa interview sang Bombo Radyo kay Romel Palalon, department head sang DPS, humalin sang gin-implementar ang color coding zonal mapping, nagnubo ang nagakabaton nga reklamo sang Bacolod Public Information Office kasubong man sang DPS.
Suno kay Palalon, subong nga adlaw, duha lamang ka mga complaints ang nabaton sang Department of Public Services natuhoy sa basura.
Ginpahayag man sini nga hugot nila nga igaimplementar sang Bacolod City Government ang City Ordinance No. 596 series of 2012 nga nagahatag sang nagakaigo nga penalidad sa mga pumuluyo nga nagahaboy sang basura sang indi insakto.
Base sa ordinansa, P500 ang multa sa individual violator ukon isa ka adlaw nga public service sa DPS.
Sa mga owner, administrator kag manager naman sang maskin anu nga business establishment nga nagbayolar diri, magabayad sang P2,500 ukon lima ka adlaw nga community service sa DPS.
