Ginakondenar sang alkalde sang ciudad ang Bacolod ang natabo sa 15 anyos nga dalagita nga residente sang Barangay Sum-Ag sa ciudad sang Bacolod kag may yara ini nga panugyan sa mga ginikanan kag mga kabataan.
Sa interview sang Bombo Radyo Bacolod kay Barangay Sincang-Airport Punong Barangay Atty. Caesar Distrito, spokesperson ni Bacolod City Mayor Alfredo “Albee” Benitez., nagapadangat sang pagpakig-unong ang alkalde sa pamilya ni Pearl Joy Galve, ang dalagita nga nasapwan nga wala na sang kabuhi sa sulod sang kampo sang tubo sa ciudad sang La Carlota.
Suno kay Distrito ginakondenar sang alkalde ang natabo sa biktima.
Kasunod sini, nagpaandam ang alkalde sang Bacolod sa mga pamatan-on ilabi na sa mga babayi nga likawan ang pagsalig sa mga tawo nga makaestorya sa social media.
Suno diri, nagpanugyan man ang alkalde nga lantawon gid ang mga kabataan agud mabantayan kag masiguro nga wala sang matabo sa mga indi maayo.
Dugang pa, nagpanugyan man si Mayor Benitez sa mga kabataan nga maglisensya sang tarong kun may kadtuan kag masami nga panumdumon nga may ginikanan nga nagahulat sa ila nga pagpauli.
